હથીયાર લાયસન્સ માટે 5 લાખ અને ‘મસાજ’ તેલ: કલેકટર સામે રાવ

05 March 2021 11:38 AM
Rajkot Crime
  • હથીયાર લાયસન્સ માટે 5 લાખ અને ‘મસાજ’ તેલ: કલેકટર સામે રાવ

અગાઉ પણ લાંચ-ભ્રષ્ટાચારના ત્રણ કેસો ધરાવતા કલેકટર સામે ચોથો કેસ નોંધતુ લાંચ-રૂશ્વત વિરોધી વિભાગ:સૌરાષ્ટ્રનાં ખેડૂતની ફરિયાદ: હથીયાર લાયસન્સ તો ન આપ્યુ. નાણાં પણ પાછા આપતા નથી અને માથે જતા ધમકાવે છે.

રાજકોટ તા.5
ભ્રષ્ટાચાર નાબુદ થઈ રહ્યાના દાવા કરતી સરકાર માટે આંખ ઉઘાડનારા નવા-નવા કેસો સામે આવતા જ રહ્યા છે જયારે એક ચોંકાવનારા કિસ્સામાં સૌરાષ્ટ્રનાં કલેકટર દરજજાનાં અધિકારીએ રોકડા નાણાં ઉપરાંત ‘બોડી મસાજ’ માટે તેલ પણ મેળવ્યાનો આરોપ મુકાયો છે.સૌરાષ્ટ્રનાં ખેડુત દ્વારા થયેલી એક ફરિયાદ મુજબ 27 જાન્યુઆરી 2020 ના રોજ હથીયાર લાયસન્સનાં બદલામાં કલેકટર ચેક તથા ઓનલાઈન ટ્રાન્ઝેકશનથી નાણા લીધાનો આક્ષેપ કર્યો હતો. હથીયાર લાયસન્સ માટે કલેકટરને તેમની જ ઓફીસમાં મુલાકાત દરમ્યાન એક લાખ ચેકથી અને 4 લાખ રોકડા માંગ્યા હતા. ચેકમાં સહી કરીને નાણાની રકમ ભરી દયો, બાકીની (નાણા સ્વીકારનારા)ની વિગતો પોતે ભરી લેશે તેમ કહ્યું હતું જયારે ચાર લાખ રોકડા લેવા માટે સફેદ શર્ટ પહેરેલો માણસ પાર્કીંગમાં આવશે.કલેકટરની સુચના મુજબ પોતે નાણાં આપી દીધા હતા.


નાણા આપવા છતાં હથીયાર લાયસન્સની અરજી રીજેકટ થયાનો ગત જુલાઈમાં સંદેશો આપ્યો હતો. જેને પગલે ફરી કલેકટરને મળવા ગયો હતો તેઓએ ગૃહ વિભાગમાં અપીલ અરજી કરવાનું સુચવ્યુ હતું.ફરીયાદીનાં કહેવા પ્રમાણે કલેકટરને બીજી વખત મળવા ગયો ત્યારે તેઓએ પોતાના વેપાર ધંધા વિશે માહીતી માંગી હતી. પોતે ખેડુત છે અને જુવાલ-તલ જેવા કૃષિ પેદાશ ઉગાડતા હોવાનું કહ્યું હતું ત્યારે બોડી મસાજ માટે ત્રણ લીટર તલ તેલ આપવા જણાવ્યું હતું. આ વખતે પણ હથીયાર લાયસન્સનો જ ઉલ્લેખ કર્યો હતો. ફરીયાદીએ બોડી મસાજ માટે ત્રણ લીટર તેલ આપ્યું હતુ. આ વખતે ઓફીસના અન્ય બે કર્મચારી પણ હાજર હતા. કલેકટરને ગીફટમાં તેલ આપતો હોવાનો ફોટો પણ પડાવ્યો હતો.


આ ઘટનાક્રમ બાદ કલેકટરે હથીયાર લાયસન્સ માટે ગૃહ વિભાગમાં કરેલી અપીલ પાછી ખેંચી લેવા સુચવ્યુ હતું. પોતે જ હથીયાર લાયસન્સ આપી દેશે તેવી સલાહ આપી હતી. કલેકટરની સલાહ પ્રમાણે અપીલ પાછી ખેંચી લીધી હતી. પરંતુ તેઓએ પછી લાયસન્સ આપ્યુ ન હતું. એટલુ જ નહિં નાણા પણ પાછા આપવાની ના પાડી દીધી હતી. કલેકટર દ્વારા ધમકી પણ આપવામાં આવી હતી. એટલે પોતે કે પોતાના પરીવારને કાંઈ થાય તો કલેકટર જવાબદાર હોવાનું પણ ફરીયાદમાં કહ્યું હતું.મહત્વપૂર્ણ બાબત એ છે કે ખેડુત દ્વારા જે કલેકટર સામે ફરીયાદ કરવામાં આવી છે તેના વિરૂધ્ધ ભ્રષ્ટાચાર-લાંચના અગાઉ પણ ત્રણ કેસ નોંધાયેલા છે લાંચ રૂશ્વત વિરોધી વિભાગે હવે ચોથો કેસ નોંધ્યો છે.


Related News

Loading...
Advertisement