ચ્યવનપ્રાશમાં પણ કેમીકલ!

24 November 2020 12:01 PM
Health
  • ચ્યવનપ્રાશમાં પણ કેમીકલ!

કેટલીક ખાદ્ય સામગ્રીની પણ ભેળસેળ : ફોરેન્સિક સાયન્સ યુનિ.નું સંશોધન

અમદાવાદ તા.24
કોરોના આવ્યો છે ત્યારથી લોકો ઈમ્યૂનિટી વધારવા માટે ચ્યવનપ્રાશ તેમજ શતાવરી પાવડર આરોગવા લાગ્યા છે. જોકે, નેશનલ ફોરેન્સિક સાયન્સ યુનિ. દ્વારા કરાયેલા કેટલાક રિસર્ચમાં સામે આવ્યું છે કે ચ્યવનપ્રાશમાં પણ કેમિકલ્સ અને કેટલીક ખાદ્યસામગ્રીની ભેળસેળ કરાઈ રહી છે. ચ્યવનપ્રાશમાં ભેળવવામાં આવતી આ દરેક સામગ્રી સ્વાસ્થ્ય માટે હાનિકારક નથી, પરંતુ તેનો ઉલ્લેખ તેના લેબલમાં કરવામાં નથી આવતો, અને ચ્યવનપ્રાશ ખરીદનારાને તેના કારણે આ અંગે કોઈ માહિતી પણ મળતી નથી. યુનિ. દ્વારા છ બ્રાન્ડના ચ્યવનપ્રાશના સેમ્પલ લેવામાં આવ્યા હતા, અને તેના કેટલાક ટેસ્ટ કરાયા હતા. આ ટેસ્ટ દરમિયાન તેમાં કેફીન તેમજ આલ્કાલોઈડ્સ, એમિનો એસિડ, કાર્બોહાઈડ્રેટ્સ, પ્રોટિન્સ, ફિનોલ્સ અને વિટામિન સીની હાજરી જોવા મળી હતી.


આ રિસર્ચ સંસ્થાના અસોસિએટ પ્રોફેસર આસ્થા પાંડેના માર્ગદર્શનમાં કરાયું હતું. તેમણે જણાવ્યું હતું કે ચ્યવનપ્રાશની મેન્યુફેક્ચરિંગ પ્રોસેસમાં સ્ટાન્ડર્ડાઈઝેશન હોવું જોઈએ, અને તેમાં જે પણ વસ્તુઓ ઉમેરવામાં આવી હોય તેનો ઉલ્લેખ તેના પેક પર કરવો જોઈએ.


આ રિસર્ચમાં દર્શિની જેઠવા, શાલ્વી અગ્રવાલ, અનિરુદ્ધ દિક્ષિત અને ચૈતન્ય નામના સ્ટૂડન્ટ્સે ભાગ લીધો હતો. પ્રો. પાંડેના જણાવ્યા અનુસાર, કેટલાક કેમિકલ્સ ચ્યવનપ્રાશમાં ઉપયોગમાં લેવાયલી સામગ્રીને કારણે ઉદ્દભવી શકે છે. જોકે, તેની ઘણા લોકોને સાઈડ ઈફેક્ટ પણ થઈ શકે છે.


ચ્યવનપ્રાશના સેમ્પલમાંથી કેફીન મળી આવવા બાબતે પ્રો. પાંડેએ કહ્યું હતું કે તે કુદરતી રીતે નથી ઉદ્દભવતું, અને તેની હાજરીનો પેકિંગ પર પણ ઉલ્લેખ નથી કરાયો. માટે, તેની ભેળસેળ કરાઈ છે તેમ કહી શકાય. શતાવરી પર રિસર્ચ માટે ટીમ દ્વારા સાત બ્રાન્ડેડ અને અનબ્રાન્ડેડ પાવડર લેવામાં આવ્યા હતા. શતાવરીમાં સ્ટાર્ચની હાજરી વધુ હોવાથી તેમાં મકાઈ કે ઘઉંના લોટની ભેળસેળ થતી હોવાની પણ શક્યતા તેમણે વ્યક્ત કરી હતી.


ગુજરાતના ફુડ એન્ડ ડ્રગ કંટ્રોલ એડમિનિસ્ટ્રેટર કમિનશર એચજી કોશિયાએ આ અંગે જણાવ્યું હતું કે, તેમણે રિસર્ચ હજુ સુધી જોયું નથી, પરંતુ આયુર્વેદિક પ્રોડક્ટ્સમાં વપરાતી ઔષધિઓમાં આલ્કાલોઈડ્સની હાજરી હોવાથી તે પ્રોડક્ટમાં પણ તે જોવા મળી શકે છે.


Related News

Loading...
Advertisement