એક કેસ..... ત્રણ સવાલ...


8 ચિદમ્બરમ-પ્રકરણે આપણી સીસ્ટમની સામે પ્રશ્ર્ન ઉભા કર્યા છે 

પુર્વ નાણામંત્રી તો હારવાની જ લડાઈ લડતા હતા પણ શું આપણે જે જોયું જે સાંભળ્યું તે જ વાસ્તવિકતા છે કે પછી કઈ ઓર પણ જોવાની જરૂર છે

સવાલ નંબર-ટુ કોંગ્રેસ પક્ષ રાજકીય દેવાળીયા બની ગયો હવે વૈચારીક દેવાળીયાપણુ જાહેર કર્યુ.... શા માટે ચિદમ્બરમને છુપાવા દીધા! સ્વચ્છ છે તો શા માટે સામી છાતીએ લડવા ન કહેવાયું. શા માટે રાહુલ-પ્રિયંકા શેરીમાં ન ઉતર્યા! પક્ષના નેતાઓનો નેતૃત્વમાં વિશ્ર્વાસ હચમચી ગયો છે. હરિયાણાના હુડા કદાચ હવે રાજકીય સલામતી તેથી જ શોધે છે.

સવાલ નં.3 ચિદમ્બરમનું સન્માન જળવાય તે જોશે તેવી ભલામણ સીબીઆઈને થઈ! ફકત વીવીઆઈપી છે એવો કસ્ટડીમાં સન્માન એ લાખો ભારતીયોનું શું જેઓને પોલીસ ગમે ત્યારે ઉઠાવે છે ટોર્ચર કરે છે. લાખો અન્ડર ટ્રાયમ સબડે છે તેના સન્માનની કેમ કદી ચિંતા થતી નથી!

સવાલ નંબર વન શું ભ્રષ્ટાચાર સામેની લડાઈનો એક નેરેટીવ બનાવીને સિલેકટ ટાર્ગેટ થઈ રહ્યા છે. ચિદમ્બરમ કે અન્ય કોઈના બચાવનો પ્રશ્ર્ન નથી પણ જેઓને ‘બચાવી’ લેવાયા છે તેનું શું! એક તરફ તમામ ‘સ્વચ્છ’ અને બીજી તરફ તમામ ભ્રષ્ટાચારીનો અભિગમ; ચીટફંડમાં ફસાયેલા મુકુલ રોય અને એક સમયના ભ્રષ્ટાચારી તરીકે સંબોધવામાં યેદુરપ્પા સ્વચ્છ! શા માટે આટલા પક્ષપલટા? કોઈ એજન્ડા નિશ્ર્ચિત થયો છે?

આખરે પુર્વ નાણામંત્રી પી.ચિદમ્બરમની લાંબી દૌટનો અંત સીબીઆઈ કસ્ટડીમાં આવ્યો છે અને કદાચ તેઓ અંતહીન લડાઈ લડશે અને જો તેમના નસીબ હશે તો કદાચ સતાપલટો થાય તો કાયમ માટે આ કેસમાંથી છુટકારો મેળવી જશે. જે રીતે હાલના સતા પર બેસેલા અનેક રાજનેતાઓ માણી રહ્યા છે. બીજો વિકલ્પ કદાચ ચિદમ્બરમ માટે મોડું થયું છે કે તેઓએ ભાજપમાં જોડાઈ જવું જોઈતું હતું તો કદાચ આજે તેઓ સીબીઆઈ કસ્ટડીમાં નહી પણ ભાજપ વડામથકે બેઠા હોય તે રીતે મુકુલ રોય બેઠા છે, યદુરપ્પાને પણ એક સમયે ભાજપે ભ્રષ્ટાચારી કરીને પક્ષમાંથી બરતરફ કર્યા હતા અને આજે તેઓ કર્ણાટકમાં ભાજપ સરકારના જ મુખીયા છે. ચિદમ્બરમ માટે આંસુ સારવાની જરૂર નથી પણ એ માટે જરૂર અફસોસ કરવાની જરૂર છે કે ભ્રષ્ટાચાર સામેની લડાઈને એક એવો નેરેટીવ બનાવી દેવાયો છે કે બધા ભ્રષ્ટાચારી વિપક્ષમાંજ બેઠા છે અને આ તરફ જેઓ છે તે બધા સ્વચ્છ છે અથવા તો તેઓ જો પાટલી બદલે તો તેઓને સ્વચ્છ થવાની તક મળશે. કદાચ આ યાદીમાં હરીયાણાના પુર્વ મુખ્યમંત્રી ભૂપેન્દ્રસિંહ હુડા છે જેઓએ સમય પારખીને જ કોંગ્રેસ મોવડીમંડળ સામે બુંગીયો ફુકી દીધો છે અને કલમ 370ના નામે તેઓ હવે ભાજપના આમંત્રણ કે કોઈ ગ્રીન સિગ્નલની રાહ જુએ છે. માયાવતી-મુલાયમ સિંહ સામે પણ અનેક કેસ છે તેમાં કયારે અદાલત સમક્ષ આવે છે અને કયારે અદ્રશ્ય થઈ જાય છે તે માટે કારણ શોધવા જાવ તો રાજકીય જ મળશે. આ કેસોનો રાજકીય ઉપયોગ થઈ રહ્યો છે અને ફકત આ સરકાર નહી પણ ભૂતકાળમાં પણ થયો હતો તે અનેક વખત આપણી સામે આવે છે.
ભ્રષ્ટાચારી સામે પગલા લેવાય તેનો વિરોધ હોઈ શકે નહી. રાજકીય ભ્રષ્ટાચાર સૌ પ્રથમ બંધ થવો જોઈએ. કારણ કે તે આ તમામ ભ્રષ્ટાચારનું મૂળ છે અને રાજકીય ભ્રષ્ટાચારનું એક કારણ આપણી ખર્ચાળ ચૂંટણી વ્યવસ્થા છે અને રાજકીય પક્ષો- નેતાઓના બેફામ ચૂંટણી ખર્ચ છતા કોઈ હિસાબ આપવાની ચિંતા કરાતી નથી અને હીસાબ માંગી પણ શકાતો નથી. કારણ કે જાહેર જીવનમાં પારદર્શકતાની વાતો કરનારા રાજકીય પક્ષોએ ખુદને માહિતીના અધિકાર સામે સુરક્ષિત કરી દીધા છે.

Image result for p chidambaram cbi case
કોઈ એક નેતા ચૂંટણી પ્રચારમાં કાર્પેટ બોમ્બીંગ જેવો ચૂંટણી પ્રચાર કરે. પાણીની જેમ લાખો કરોડોના વિમાની પ્રયાસના ધુમાડા થતા જોઈએ છતાં પૂછી ન શકીએ કે આ પૈસા આવ્યા કયાંથી! નવું ઈલેકશન બોન્ડ નામનું કવચ શોધી લેવાયું છે. અમોને આ બોન્ડ મારફત નાણા મળ્યા છે પણ કોણે આપ્યા! જવાબ નથી! શા માટે શાસક પક્ષને જ સૌથી વધુ ભંડોળ મળે. કારણ સૌ કોઈ જાણી શકે છે છતાં જવાબ નહી! હાલમાં જ રાજકીય પક્ષોને મળતા ભંડોળના આંકડા જોવો તો તમામ નાણા જો પ્રવાહ એક તરફ જ વળી રહ્યો છે.વિપક્ષોને આર્થિક રીતે પણ કંગાળ કરવાની આ એક પદ્ધતિ છે. છતા તંદુરસ્ત લોકશાહીની વાતો વચ્ચે વિપક્ષનું નામોનિશાન મીટાવવા પ્રયાસ થાય છે.ટચુકડા સિકકીમમાં એક સ્થાનિક પક્ષના 10.10 ધારાસભ્યો રાતોરાત પક્ષાંતર કરે!કઈ લાલચ કામ કરી ગઈ! જવાબ નથી રાજયસભાનાં સભ્યો રાજીનામાં આપી રહ્યા છે. શા માટે! સૌ કોઈ જાણે છે કે હવે કઈ તરફ રહેવામાં સલામતી છે અને તેના કારણે જ ગુજરાતના એક વિપક્ષી ધારાસભ્ય જેને જેલમાં જઈને ‘બ્રહ્મજ્ઞાન’ લાદયુ કે જેલમાં રહેવુ કે પક્ષ છોડવો તે નિર્ણય કરવાનો સમય આવી ગયો! પક્ષ છોડી દીધો ફરી નવા પક્ષની ટીકીટ પર ચૂંટાયા સતાની સાથે થઈ ગયા હવે કોઈ અદાલતી ચિંતા નથી. કારણ કે કેસ કેમ આગળ વધારવો તે સરકારના હાથમાં છે આથી જ એક સમયે ચીટ-ફંડમાં ફસાયેલા મુકુલ રોય આજે ભાજપના સન્માનીય નેતા છે. યેદુરપ્પાને ભાજપે એક સમયે એટલે જ પક્ષમાંથી હાંકી કાઢયા કે તેઓ ભ્રષ્ટાચારી હતા પણ સમયની જરૂરિયાત મુજબ હવે તેઓ સ્વચ્છ બનાવી દેવાયા છે. જથ્થાબંધ પક્ષાંતર થાય છે. ધારાસભ્યો 11 કરોડની કાર ખરીદે છે. કયાંથી આવ્યા પૈસા ઈન્કમટેકસ વાળા પણ કદી પૂછતા નથી. પૂછશે ત્યારે જયારે સતા પક્ષને જરૂર હશે.


ચિદમ્બરમ કેસમાં બીજો મુદ્દો કોંગ્રેસ પક્ષનો છે જે ફકત રાજકીય જ નહિં વેચારીક રીતે પણ દેવાળીયો બની ગયો છે ચિદમ્બરમ કસ્ટડીમાં જતા પક્ષના જ સિનિયર ધારાશાસ્ત્રીને રાતોરાત દોડાવ્યા. ગઈકાલ સાંજ સુધી ટ્રાયલ કોર્ટમાં દલીલો કરી અને રાજકીય બદલાની ભાવનાથી આ કેસ-ધરપકડની કાર્યવાહી થઈ છે તેવી બુમરાણ થઈ પણ આ પક્ષમાંથી કોઈ એક નેતા નોટ-ઈવન-રાહુલ કે પ્રિયંકામા એ વિચાર ન આવ્યો કે ચિદમ્બરમને કાનુને શરણે થઈ જવાની સાચી સલાહ આપવામાં આવે વાસ્તવમાં કોંગ્રેસનાં આ બન્ને યુવા નેતૃત્વએ ખુદે ચિદમ્બરમની સાથે સીબીઆઈ વડામથકે હજારો લોકોની સાથે પહોંચી જઈને જો રાજકીય બદલો હોત તો તેને પડકાર્યો હોત તો આજે કોંગ્રેસમાં હવે જે બિલાડી નજરે ચડતા ઉંદર ભાગે છે તેવી સ્થિતિ સર્જાઈ ન હોત જો ખરેખર ચિદમ્બરમની ભ્રષ્ટાચારી નથી તો પક્ષે તેમની સાથે આ શો કરવાની જરૂર હતી. બચાવવાની નહીં! કોંગ્રેસ મોવડી મંડળ તેની તમામ લડાયક તાકાત ગુમાવી બેઠુ છે. પ્રિયંકા-રાહુલ ટવીટ કરીને સરકારને પડકારે છે. પણ હિંમત નથી કે શેરીઓમાં ઉતરે, ભય છે રેલો તેમના બારણે આવી શકે છે. આ સ્થિતિની હવે બિલાડીને મનગમતા શિકાર કરવાની તક મળી છે. વધુ એક મુદ્દો ગઈકાલે ચિદમ્બરમને સીબીઆઈ કસ્ટડીમાં સોંપતા સમયે ન્યાયમુર્તિએ ભલામણ કરી કે તેઓનું સન્માન જળવાય તે જોવાનું રહેશે!


ફકત ચિદમ્બરમ જેવા વગદારને માટે જ આ ભલામણ શા માટે. દેશમાં કોઈ સામાન્ય વ્યકિતના કેસમાં શું આવી ભલામણ થઈ છે! અધિકાર તો બધાને સમાન છે. પોલીસ ધરપકડ તો રોજ હજારોની કરે છે રીમાન્ડમાં કઈ રીતે થર્ડ-ડીગ્રી ટોર્ચર થાય છે અને જેલમાં કોઈને આ રીતે ભલામણ થતી નથી. તો શું તેઓને ખુદનું સન્માન નથી! આવી ભલામણો ફકત વીવીઆઈપી માટે જ!

\
Advertisement