ભુજના કસ્ટોડિયલ ટોર્ચરની ફરિયાદમાં IPS નિનામાને એક વર્ષની જેલ

02 May 2018 09:21 PM
Rajkot Gujarat
  • ભુજના કસ્ટોડિયલ ટોર્ચરની ફરિયાદમાં  IPS નિનામાને એક વર્ષની જેલ

ભુજ કોર્ટનો ચુકાદો : 2001માં નિનામા જ્યારે ભુજમાં ડીવાયએસપી હતા તે સમયે તેમની સામે આ કેસ નોંધાયો હતો

Advertisement

રાજકોટ: કસ્ટોડિયલ ટોર્ચરના 17 વર્ષ જૂના એક કેસમાં ભુજની કોર્ટે આઈપીએસ ઓફિસર મનોજ નિનામાને એક વર્ષની કેદ અને 1 હજાર રૂપિયાના દંડની સજા સંભળાવી છે. 2001માં નિનામા જ્યારે ભુજમાં ડીવાયએસપી હતા તે સમયે તેમની સામે આ કેસ નોંધાયો હતો. તેઓ હાલમાં ઈન્ટેલિજન્સ બ્યૂરોમાં ફરજ બજાવી રહ્યા છે.

આ કેસમાં એડિશનલ જજ વી ડી મોઢે નિનામાને આઈપીસીની કલમ 323 અંતર્ગત દોષી જાહેર કર્યા હતા, પણ નિનામાના વકીલે સેશન કોર્ટમાં અપીલ કરવા માટે સમય માગતા પોતાનો આદેશ એક મહિના માટે રોકી દીધો હતો.

2001માં ભુજ કોર્ટમાં મોહમ્મદ ઈસ્માઈલ સામાએ નિનામા સામે ફરિયાદ નોંધાવી હતી. ફરિયાદ મુજબ, ચમન ગોર અને પ્રતાપસિંહે ન્યૂઝપેપરમાં પોતાની જમીન વેચવાની જાહેરાત આપી હતી અને તે અંગે કોઈ વાંધા-દાવા હોય તો રજૂઆત કરવા જાહેરાતમાં જણાવાયું હતું. જેની સામે મોહમ્મદ સમાએ ન્યૂઝ પેપરમાં જાહેરાત આપી આ જમીન પર પોતાનો હક હોવાનું જણાવી તેના વેચાણ સામે વાંધો નોંધાવ્યો હતો.

ફરિયાદમાં જણાવાયું છે કે, સામાને ભુજ પોલીસ સ્ટેશનમાં બોલાવાયા હતા અને નિનામાએ તેમને પોતાનો વાંધો પાછો ખેંચી લેવા જણાવ્યું હતું. જોકે, તે માટે સમા રાજી થયા ન હતા. સામા સામે આઈપીસીની કલમ 385 અંતર્ગત ગુનો નોંધી તેમને પોલીસ કસ્ટડીમાં ટોર્ચર કરવામાં આવ્યા હતા. બીજી દિવસે સમાએ ભુજની કોર્ટમાં ફરિયાદ નોંધાવી હતી. કોર્ટે સામાનું મેડિકલ ચેકઅપ કરાવવાનો આદેશ આપ્યો હતો.

સામાના વકીલ હેમસિંહ ચૌધરીએ જણાવ્યું કે, ‘મેડિકલ ચેકઅપમાં ઈજા થયાનું બહાર આવતા કોર્ટે તપાસનો આદેશ કર્યો હતો. આટલા વર્ષો દરમિયાન કોર્ટે નિનામાની કેસ રદ કરવાની અરજી પણ ફગાવી દીધી હતી.’

2004માં ચાર્જશીટ ફ્રેમ કરવામાં આવી હતી અને તે પછી કેસ પુરાવાના આધારે ચાલી રહ્યો હતો. ચૌધરીએ જણાવ્યું કે, ‘કસ્ટડીમાં ટોર્ચરની આ ઘટના બની તેનો તે સમયે પોલીસ કસ્ટડીમાં રહેલો અન્ય એક આરોપી પણ સાક્ષી હતો અને દલીલો સાંભળ્યા બાદ કોર્ટે નિનામાને દોષી જાહેર કર્યા હતા અને સજા સંભળાવી હતી.’ કોર્ટે પીડિતને 10 હજારનું વળતર આપવાનો પણ નિનામાને આદેશ આપ્યો હોવાનું ચૌધરીએ જણાવ્યું હતું.


Advertisement